遊戲介紹
210 views 0 comments

XCOM 2: War of the Chosen – 回合制打喪屍係好好玩嘅

by on 八月 30, 2017
 

玩咗成晚《XCOM 2: War of the Chosen》, 呢隻$3XX嘅DLC, 其實應該係叫Expansion先啱。佢真係加咗好多新原素入去。我唔浪費時間講加咗咩喇, Public Information, 自己睇。但係我想講吓我尋晚玩得好開心嘅一個Mission, 係叫我去一個荒廢咗20年嘅城市搵兩個叛軍代表人, 然後以第三方身份促成佢哋肯一齊合作對抗外星人。你隊Team係要分成兩組, 每組兩個人, 一個人去Reapers嗰邊搵佢個代表, 一個要去Skirmisher嗰邊。然後兩Team人再去一個會合點展開會談。

落到去地面, 開始同Reapers嗰邊個代表出發去個會合地點。行行吓, 冇啦啦有啲叫做「The Lost」嘅敵人出現。佢哋係XCOM版嘅喪屍。一出就出6、7隻咁, 衝埋嚟打你啲人。你自己呢邊得3條友…點打咁多隻?

原來打呢啲喪屍佢有個特別條件, 如果你一鎗之內殺到一隻, 你就可以免費咁用多一個Action。即係話, 你理論上係可以一鎗一隻咁打曬佢成Group。咁又好似容易得滯?

我隊Team入面係一個Ranger加埋一個Rookie。開頭我用住Ranger支Shotgun一鎗一隻咁打, 但係問題係, 我得4飛子彈, 打打吓就要Reload。於是乎我咪用隻Ranger埋身斬人囉! 點知條友仔Miss咗, 一Miss佢就冇得再行…變咗企咗嚮堆嘢中間。為咗保住佢條命, 我用個Rookie幫佢打咁幾隻, 但係連佢都冇埋子彈…仲有兩隻攻擊到個Ranger嘅範圍。冇法, 掉手榴彈…

一掉先知, XCOM版喪屍同樣係會被聲吸引。嗰頭掉完手榴彈, 佢又爆多兩Group出嚟。突然之間我班友就俾10幾隻喪屍圍。雖然打佢哋係有6-70%機會中, 但係你冇辦法打得曬…於是乎變咗就要一路走一路打。嗰種感覺就好似睇《Walking Dead》咁, 好鬼刺激。

打到後段, 劇情原因, 搞到成個城啲喪屍都走曬嚟, 基本上每一個Turn都生多6、7隻出嚟。我隊Team要去到隔住一橦大廈後面嘅撤退位置。呢一場打到我叫曬救命…

我Team人入咗間大廈入面, 啲喪屍係咁由門口、窗門湧入嚟。俾人困咗嚮度走唔到。我可以衝出去…但係出面咁多隻, 就咁出去一定會有損傷。打咗兩個Turn, 見佢生出嚟嘅喪屍已經多過我一個Turn內可以殺到嘅份量, 唔諗喇, 索性用手榴彈炸鬼爛大廈外牆, 自己製造個出口走。我首先走一個人出去到個撤退位, 然後由佢幫手掩護其他人從個缺口出嚟。

最後去到個撤退位條友真係差啲走唔甩, 俾隻喪屍打咗一嘢…我完個Mission之前Zoom Out個地圖睇睇…嘩~~~ 好多喪屍呀, 哈哈。

噢, 仲有佢啲Chosen, 係好似玩《Shadow of Mordor》咁, 佢會升Level, 加Skill或者弱點。又會記住你同佢之間啲戰鬥。佢會無啦啦嚮你做緊其他Mission時走出嚟。呢部份又係好過癮, 令到隻Game多咗好多人物之間嘅關係。

如果你喜歡XCOM, 呢隻嘢真係唔可以錯過。