遊戲介紹
473 views 0 comments

The Shrouded Isle – 邪教教主模擬器 – 神啊! 我標眼水了

by on 八月 7, 2017
 

遊戲名稱 : The Shrouded Isle
遊戲平台 : PC, Steam
遊戲類型 : SIM
開發廠商 : Jongwoo Kim , Erica Lahaie , FX Bilodeau , Tanya Short
支援語言 : 英文、簡體中文、日文 (及其他地區語言)

神啊! 我標眼水了~~

呢隻嘔吐綠色出現嚮個Steam新遊戲列表度, 真係好難會睇唔到…睇多兩眼開始覺得有點唔妥…繼續望落去會唔會盲?

呢個應該係每一個人第一眼見到《The Shrouded Isle》(Steam頁面) 之後嘅感覺。由於佢個用色實在太「標青」(啲青色真係標出嚟), 我又忍唔住去睇吓佢玩咩。嚮冒住眼盲嘅情況下, 我睇咗條片, 發現呢隻嘢個概念又真係幾過癮喎!

遊戲係嚮一條隱世嘅村莊度發生。根據村嘅傳說, 邪神於500年會復甦, 並且改變整個世界。只有邪神認為係「有價值」嘅人先可以同佢一齊進入呢個新世代。時為497年, 你有3年時間, 身為呢個邪神教嘅大祭師; 你要管理好你手下嘅信眾, 並且用活祭、用鮮血去供奉邪神。到底到邪神復甦時, 你係唔係可以合資格進入下一個紀元呢?

遊戲入面有5個大家族, 每一個回合, 你要從每個家族入面推舉一個出嚟做顧問。呢啲家族成員每個都隨機咁有唔同嘅美德同缺憾。佢哋可以幫你進行維持啲村民信仰嘅工作, 好似係燒書、建石碑、拉異教徒去鞭刑之類。靠睇佢哋嘅「工作表現」, 你要嚮每一季嘅終結時從呢5個顧問入面挑出一個罪人出嚟俾佢至無上嘅榮耀 : 永遠咁可以陪伴於神嘅旁邊…即係活祭佢。



當然家族入面嘅人唔會想見到自己家人被殺, 佢哋自己都有一個「忠誠度」要你去維持。如果唔係, 佢哋就會密謀推你落位, 自己坐上去做主教。

先唔講佢隻綠色, 睇個概念已經覺得係好正。不過咁, 佢並唔係一隻好長慢慢玩嗰種遊戲。反而係有點似一隻Board game咁, 一鋪玩你個零鐘, 之後每次再玩就從新開始, 啲人物係隨機生成, 所以每次玩都會有點唔同。值唔值佢個叫價HK$ 75呢? 就見仁見智。

至於佢隻綠色嘛, 係有得改, 另外仲有兩隻色可以揀, 但唔等於你會睇得舒服啲… …… …