遊戲介紹
殿堂級遊戲 Hall of Fame
432 views 0 comments

Pyre – 進入童話式幻想世界 – 遊戲評測 – 點睇?

by on 七月 27, 2017
內容
 
遊戲介紹
遊戲平台:

PC, Steam, PS4

遊戲類型:

另類RPG

開發廠商:

Supergiant Games

支援語言:

英文

 

Pyre - 進入童話式幻想世界 - 遊戲評測 - 點睇?

Update 1: Pyre – 爆機後更新 (零劇透)

有時做得多Review, 好自然咁就會嘗試用一種好系統化嘅方式去評論一隻遊戲。單係睇我呢個Site俾分嘅方法都可以見到。呢個可能係最「方便地」變得客觀嘅方法。

但係有時, 正如之前隻《NieR: Automata》咁, 你真係唔可以將隻Game就咁拆開佢嚟講。隻《NieR》, 如果將佢分開咁講, 佢可能只係一隻中上級遊戲。而《Pyre》(Steam頁面) , 如果將佢分開嚟講, 可能已經馬上成為Game of the Year…

但係我真係冇辦法可以合埋眼咁就話佢係正到好緊要, 我只能夠讚完曬啲好嘢, 再講點解佢嚮我嘅心目中, 未能夠成為Supergiant Games最出色嘅遊戲。

睇星睇「High」咗

好似童話故事嘅插畫咁用咗好多鮮艷顏色, 佢每一樣嘢嘅設計都有好多特出嘅細節。

望那星我承認我對Supergiant Games呢間廠做嘅遊戲係特別嚴厲, 因為佢哋之前已經證明過俾我睇, 佢哋係可以做得出唔單止好玩, 同時又可以做到如同藝術一樣, 可以令人回味細嘗嘅作品。

今次隻《Pyre》嚮成品質數上, 同過去佢哋兩隻作品比較, 可以講係有過之而無不及。美術風格上可能係Supergiant最大膽創新嘅一次。佢每一個場景、人物、同埋物品, 就好似童話故事嘅插畫咁用咗好多鮮艷顏色, 佢每一樣嘢嘅設計都有好多特出嘅細節。

單係佢嗰個星空, 睇落好似好簡單冇咩嘢, 但係睇埋佢點樣運用顏色上轉變去表達出玩家角色同啲神明嘅關係, 點樣將星空描寫成為一個冷漠、但係又係大家唯一出路嘅生機。你會以為我係唔係「對」大咗, 搞到幻想咗咁多嘢出嚟。但係嚮好多部份我都能夠體會到呢種感受。甚至我可以誇張啲講, 佢真係好似童話故事咁可以刺激到玩家嘅想像力。

無論你最後會唔會同我有同一樣感受。我相信一點不可否認嘅係, 佢真係放咗好多心機落去每一個畫面度。令到睇到嘅人不時會讚嘆, 亦吸引到玩家用心去慢慢欣賞啲細節。



音樂同遊戲結合

做到一隻音樂可以同遊戲入面嘅情節互動, 呢個先係最高境界。

幫個癲嘅溝仔當我知道佢仍然會用返《Bastion》同《Transistor》嘅作曲家Darren Korb去幫《Pyre》做配樂時, 我都已經知道音樂一定有返咁上下水準。開頭睇佢條Trailer, 同埋聽佢哋放出嚟啲Soundtrack, 我有啲擔心佢未必會好似《Transistor》做得咁好。但係到配合埋遊戲畫面, 就開始理解到佢個風格同感覺。玩落有好多時候, 我都會突然間留意到佢背景音樂改變, 從而停低手上做緊嘅嘢去聽佢啲音樂。

最令我印象深刻嘅一部份係去到遊戲入面個市場。當你睇緊買咩時, 個店員會跟住音樂哼歌咁。佢唔係好似Red咁唱得好聽嗰隻架喎! 而係一個麻甩佬無無聊自己唱歌自己聽咁。你甚至可以Click佢, 叫佢收聲, 之後佢會好唔開心木曬咀仔咁。呢啲細節唔單止令到音樂更特出, 更令到啲人物個性格可以浮現出嚟。呢個我個人應為就係做遊戲音樂好重要嘅部份。要作一隻好聽嘅音樂唔難, 要做到一隻音樂可以同遊戲入面嘅情節互動, 呢個先係最高境界。

成班癲嘅去旅行

我哋班人周圍走來走去執啲癲嘅人上車, 佢哋真係好鬼可愛, 為個旅程帶來好多娛樂。

我嚮旅途中遇到好多唔同人物, 好多都令人有深刻嘅印象。佢哋啲對白都寫得好好, 而且性格亦好鮮明。故事同人物上面, 佢今次係有心要做到有返啲童年Feel。但係佢又唔係好似啲狄狄尼嘢咁; 單純、兩極化、黑白分明。佢啲人物係有好卡通化性格, 但係佢哋被設定成放遂咗嚮一個好危險同黑暗嘅世界。

成班癲嘅去旅行有個人物, 我改咗佢叫做Fae (Game入面你可以選擇佢個名), 一開波認識佢時佢就已經胡言亂語, 又話同你坐緊架木頭車係兄妹, 又同架木頭車傾計咁。又有一個來自敵人嗰邊隊伍嘅「騎士」, 係嗰隻講正義, 但係又超級Hyper, 問完你嘢自己會High到唔聽答案就走咗去嗰種人。我係咁笑我哋班人周圍走來走去執啲癲嘅人上車, 佢哋真係好鬼可愛, 為個旅程帶來好多娛樂。

但係無論呢班人係幾得意、幾開心都好。講到尾, 大家個目標, 無論係你班朋友定係敵人, 都只係想離開呢個如同地獄嘅地方。就係有呢種同每個人物性格相反嘅處景同情況, 令到個故事唔係白白癡癡咁笑吓就算, 而係一個過程、一個經歷。



考你英文能力

佢揀用嗰一個字, 唔係為咗難倒你哋班玩家, 而係嗰一個字先能夠表達到佢想表達嘅含意。

難怪佢講呢隻遊戲要做外文翻譯係有難度, 因為真係好難將佢故事表達手法在翻譯完後仍然可以原汁原味地保留。對於英文唔係太好嘅朋友, 可能真係會有點難明白點解佢會用咁嘅方式去寫個故事。佢有啲生字我真係投降唔識…但係我好肯定佢揀用嗰一個字, 唔係為咗難倒你哋班玩家, 而係嗰一個字先能夠表達到佢想表達嘅含意。

成隻遊戲入面好多嘢都離唔開「書」呢個題材。玩家個角色之所以會同呢一班人嚮埋一齊, 都係因為佢識得讀書。成個故事個焦點都係放嚮一本書上面。甚至入到個「戰鬥」部份, 你班隊員都係進入咗一本書入面咁。所以將個故事寫成好似寫緊小說咁, 都係一個乎合設定嘅做法。

天書

進化版《Winning》

如果想返轉頭, 《Winning Eleven》出咗咁多集咪又係差唔多。打波遊戲就係咁上下。

玩法方面今次的確引起咗唔少爭議。大部份人都覺得佢個「打波」系統係好有創意, 好好玩。亦有人覺得同之前啲遊戲改變得太大, 變成咗一隻運動遊戲咁。我個人睇法係我情願見到一間廠商嘗試突破出佢個「安全範圍」, 好過佢因為怕出事而一成不變。再者, 話就話《Bastion》同《Transistor》都係一隻好玩嘅遊戲, 但係其實某程度上, 佢兩個都係有點不足之處。並唔係可以就咁當係一條成功嘅處方, 用完再用。

看看威風的他...《Pyre》又點呢? 有點可惜, 都仲未係好完善。打波嗰部份去到後來的確係幾刺激, 幾有趣。佢嘗試做到成個系統好簡單, 基本動作就係得咁多, 就算係擴充, 都只係向橫發展。例如最開頭你係得傳波、快跑、跳起呢幾個動作, 後來你就會有啲同伴識得飛、識得自爆、又有啲係一路行會留低條尾, 你可以隨時引爆嚟驅逐敵人。不過實質上玩起上嚟, 呢啲嘢你用唔用玩唔玩都唔係必要。佢只不過係其中一個幫你「入波」嘅工具。但係如果想返轉頭, 《Winning Eleven》出咗咁多集咪又係差唔多。打波遊戲就係咁上下。

就算係講到《Transistor》, 佢其實在最基本情況下, 都唔算係好多變化。但係佢同埋《Pyre》都係, 勁就勁在有好多俾玩家按照自己喜歡去改變個系統嘅方法, 從而令到玩法因為你嘅選擇而改變。《Transistor》入面就係可以自己去砌唔同嘅招數出嚟, 而《Pyre》入面, 就係靠你點樣去育成你隊伍入面嘅人物。由於我未玩到可以好深入咁去諗點用每一個人, 我只能從表面睇佢啲技能睇落真係有好多可以改變個玩法嘅嘢。例如你裝備咗呢個技能, 你就可以好似玩躲避球咁用個波去掟死人, 又或者係有個技能令你可以跳埋去撞死人咁。每個人物只可以裝備四個技能同一件物品, 所以變咗你去設定每一個人時就要考慮清楚想點打法先去設定個組合。

育成隊伍

規模太大反而係一個局限

好似有啲Overextend, 玩大咗。搞到要去改變個系統嚟就返個規模。

我有個感覺係佢哋好想做到隻遊戲夠大、夠耐玩。想玩家可以重覆咁玩去睇唔同選擇下嘅變化。但係就好似有啲Overextend, 玩大咗。搞到要去改變個系統嚟就返個規模。例如因為有太多對白嘅關係, 佢哋唔可以全部都有配音, 於是乎戰鬥以外嘅對白都係用一句外星文咁講一講, 之後就睇字。

佢想做到你有一種踏上旅途嘅感覺, 但係每個場景都冇探索嘅原素, 選擇亦只局限於行上路定下路, 揀邊條路最終個變化都唔係好大。做唔到好似《Banner Saga》咁嗰隻, 要玩家一路向前一路要諗應該點做。講起嚟, 佢係唔係因為想做手機版先咁搞呢? 我的確係有點懷疑。

Pyre戰鬥系統

個人睇法

 佢每樣原素都做得好好, 但係我又會覺得以佢哋嘅實力, 應該要做得更好。

艾殊推薦

艾殊推薦!

正如我一開始咁講, 呢隻遊戲喺每個個別部份都做得十分唔錯。當所有嘢串連起嚟, 都係有Hit有Miss。我唔想俾一個令人誤會嘅訊息以為隻Game唔掂, 佢絕對俾起好多遊戲都正。如果話《Transistor》好似一套經典嘅歌劇, 咁《Pyre》就好似係一本令人印象深刻嘅文學作品咁。又正如歌劇或者睇書, 都唔係咁大路, 咁易令大眾都可以接受。如果你唔係喜歡睇字, 唔喜歡要吓吓靠自己去發揮幻想力, 甚至係唔鍾意啲有少少低B嘅童真嘢, 咁呢隻一定唔適合你。

在我個人而言, 我可以理解同明白佢哋想玩咩風格, 某程度上我都覺得佢執行得好好。但係就總係覺得都係《Transistor》可以俾到我有更大嘅共鳴。 佢每樣原素都做得好好, 但係我又會覺得以佢哋嘅實力, 應該要做得更好。點都好, 佢雖然做唔到十大, 但係都可以話係頭二十名內冇走雞。期待三年後下一隻Supergiant嘅作品。希望佢哋繼續努力創新, 繼續做好嘢俾我哋玩!

Update 1: Pyre – 爆機後更新 (零劇透)

好嘢

所有原素都好俾心機
畫面真係好靚、有豐富想像力
音樂同遊戲配合得好好
人物設計十分有趣
隊伍育成有好高自由度

衰嘢

「戰鬥」系統太簡化
場景冇咩探索成份
故事選擇只係改吓數字就算 (請睇爆機後更新)
好多對白冇配音、要讀好多字

Editor Rating
 
畫面
9.5

 
音樂
9.5

 
聲效
9.0

 
系統
9.0

 
個人傾向
9.0

艾殊哥無定向評分:
9.1


總結
 

個人嚟睇, 唔係Supergiant Game做過最好嘅遊戲, 但係遠比好多遊戲好。畫面、音樂同埋系統設計可以清楚睇到開發者放咗好多心機。雖然最後入唔到心目中十大, 但係二十大一面一定有佢份。