遊戲介紹
253 views 0 comments

Pyre – 爆機後更新 (零劇透)

by on 七月 31, 2017
 

Pyre Launch Trailer

如果未睇的話, 建議先睇咗之前個評測先。

我好努力地趁星期六、日放假打爆咗《Pyre》, 冇拍片, 因為之前個反應都唔係咁得, 不如專心自己玩。但係我有小小嘢想更新。之前個評測入面講嘅嘢大部份都仲係維持原判, 唯獨係故事方面我現在有多一點理解, 可以同大家分享, 冇劇透, 可以放心睇。

首先我想講嘅係, 我之前話佢啲故事入面嘅選擇最多都係數字上改變。仍然係冇錯, 佢差不多80%嘅選擇都係咁。但係另外嗰20%係足以令到個遊戲故事有改變。唔劇透情況下討論, 呢啲選擇關乎到最後個結局, 而且係會令到玩家有一種唔知點取捨嘅感覺。不過整個前題係建基於你真係有用心去睇佢個故事, 同埋對啲人物有感情。

到我第一次要作出呢種選擇時, 我都仲係未對啲人物有咩特別大感覺, 所以好輕易咁就過咗。但係隨住遊戲進行, 我開始同班友仔「建立咗關係」之後, 就開始感覺到好難取捨, 甚至有點怕又係要作出呢種選擇嘅時候; 不斷諗到底應該點做…

仲有一樣嘢我覺得之前講得唔係太清楚嘅係, 你可以透過專登打輸嚟去成全其他隊伍, 又或者令到自己嚮重要比賽入面, 面對住你想要面對隊伍。呢啲選擇 (贏定輸), 都會影響到個故事。

我玩過有一場好重要嘅賽事時, 其中一個隊員懇求我輸咗佢。但係我又對另一個隊員作出咗承諾係要贏先得…當下真係覺得好難決擇。如果佢兩個是但一個係好乞我憎, 咁我就唔駛煩啦, 但係最慘係, 呢隻遊戲入面個個人物我都鍾意。

最後想補充係, 隻Game係冇NG+呢樣嘢。即係爆機後再打第二次, 所有嘢都係重來。我當初唔知, 仲係咁為第二次玩鋪路。呢樣嘢好唔似Supergiants過去做法。亦令我覺得好可惜… 佢唔係想玩家玩多幾次隻遊戲架咩? 吓吓要重新嚟過, 又要面對住低智A.I.去到後來先有返啲挑戰, 咁唔係同不斷重玩呢個理念有點背道而馳?

呢個遊戲我依然係覺得好出色, 要爆一次機大約用12個鐘左右。但係如果想睇曬啲故事, 真係唔知要用幾耐。我唔知我仲會唔會有心機去爆多次, 但係我又真係想睇吓某啲重要決擇揀唔同嘅嘢會有咩改變。可能趁呢期冇咩其他遊戲, 即管去試吓再玩一次。係咁!