遊戲介紹
估你唔到獎 (Gulingdoe Award)
508 views 0 comments

Hellblade: Senua’s Sacrifice – 遊戲評測 – 點睇?

by on 八月 10, 2017
內容
 
遊戲介紹
 

遊戲名稱 : Hellblade: Senua’s Sacrifice
遊戲平台 : PC, PS4 (如果香港Sony肯出俾你玩的話)
遊戲類型 : ACT/ADV
開發廠商 : Ninja Theory
支援語言 : 英文、正體中文、簡體中文、日文及其他地區語言

Ninja Theory…一間出親啲遊戲都係一般一般、一間將自己個老闆做成主角放入佢隻《Devil May Cry》入面、一間拍親宣傳片都令人摸不著頭腦嘅Studio。「Professional」一詞, 從來嚮我腦海中冇同呢間公司連埋一齊。呢隻《Hellblade》佢哋個策略係: 「做一隻Indie budget嘅AAA遊戲」… 講真, 我當初只有兩個想法: 一、佢哋只係想搵藉口做少啲; 二、冇Publisher再肯搵佢哋做嘢… 我冇想過佢哋會成功, 甚至睇完曬佢啲宣傳之後都仲未明佢想點, 從而對佢隻Game發出「陷阱警戒」最高嘅紅色級別。

最後證明我係錯咗…咁即係我只不過都仲係一個稍為比較高等級嘅半神, 未去到真係神嘅階段。唉, 冇法… 身邊啲人Level太低, 拖累埋我。

Indie規模嘅AAA, 你講乜嘟?

Hellblade: Senua’s Sacrifice》應該係可以歸類為一隻動作冒險遊戲。佢只賣AAA遊戲一半價錢, 提供嘅遊玩時間都有8個小時咁長。你玩嘅係一個塞爾特部落嘅女子, 單身闖進海拉, 為咗去救返佢嘅至愛迪利安。… 我照翻譯做架咋。

要救至愛; 主角Senua (呢個譯唔到) 前往呢個死人地方, 呢樣嗰樣之類, 總之就係要睇吓故事、解吓謎、打吓嘢咁。遊戲個節奏一啲都唔快, 係偏向著重於故事同埋畫面上面嘅表達, 似係睇電影多啲。

大家都用《Unreal》, 點解佢哋叻咁多?

你可以清楚見到佢放咗好多心機落去做場景同人物, 有人讚佢畫面超靚, 無可否認, 佢係用足曬現今遊戲嘅畫面處理技術去做每一樣嘢。好多時候睇見啲環境, 你會覺得佢有好真實嘅感覺, 有時甚至覺得係睇緊電影入面嘅真人。而Senua嘅動作明顯係用咗好高級嘅Motion Capture去做, 你睇佢用起把劍上嚟, 堅係好型。

不過! 我個人睇法係, 拎住個Unreal Engine, 除非你係好似某大國啲公司咁靠用個Engine名嚟呃人, 否則要做到佢呢個質素都只算係達到到要求。再者, 我會覺得要做得真實, 係技術層面上嘅事。但係要做得「靚」卻係同個美術設計方向有關。

呢一方面, 我覺得《Hellblade》只係一般。佢用咗好多心血去盡可能忠實地逞現塞爾特同維京文化出嚟。明白到佢想做到係現實中一個人物, 走入一個幻覺入面嘅感覺。但係畢竟, 要玩闖入地獄救人, 你唔會希望只係見到一般嘅建築物、樹林、同埋村莊咁簡單吧? 就算談到後來最大膽嘅設計, 個人感覺都仲係覺得唔夠睇頭, 應該係可以再玩得大啲。



導演話咁, 你就要咁!

另一個對我嚟講係《Hellblade》嘅弱點, 就係為咗確保咩都有「電影感」,  開發者唔想俾好大自由度玩家, 遊戲設計上好明顯係想限制你可以睇到、做到嘅嘢。場景細同埋局限係其中之一, 你一路玩你會好清楚咁見到路徑A同路徑B, 兩條路最後都可能係合返埋一齊, 又或者係行兩步就已經係盡頭。

佢個視點係設得離個主角好近, 令人覺得好辛苦… 呢個係佢想做到嘅侷促感?? 唔知, 我只係有想嘔吐嘅感覺。你想郁個Cam去望清楚上面同下面? Sorry, 唔得, 佢會自動幫你撥返去水平。如果你要睇上同下, 你一係停低、一係就咪八掛, 按開發者意願望向佢要你望個角度。

我又碰到唔止一次隻遊戲安排咗我要咁做, 我唔跟足就要死嘅情況。好似打隻Boss, 佢插把劍落地, 地下有啲火標出嚟咁。你鬼知呢吓原來你係可以行埋去, 仲要打停佢咩! 係呀, 佢其實耳邊一直講緊叫我:「Stop him!」… 我諗咗幾秒先知係要埋去打斷佢囉。慢咗一慢, 佢就播個Cutscene整死我。

呢個只係其中一個例子, 佢仲有大量呢類型嘅死法, 全部都唔係講得太清楚要點做, 又或者唔會俾時間你去分析應該點做。

呢個做法我真係覺得佢有點Cheap, 甚至令我聯想起多年前嗰隻Alone in the Dark嘅Reboot咁, 要你不斷死去「學」點過關。雖然, 佢係有兩把聲提我…但係唔知係因為我咁多年來Train到自己係會自動無視我個腦入面嗰幾條友講嘢, 定係佢俾個時間唔夠啦, 總之就覺得咁死法唔係我嘅錯。

點解我啲幻聽冇咁有用?

俾到一個好正面印象我嘅, 係佢點利用聲音嚟作為遊戲原素之一。主角Senua, 係一個患有思覺失調同埋自閉症嘅人, 佢成日都會有幻覺同埋幻聽。開發呢隻遊戲時, Ninja Theory特別請咗一個精神病學家同埋一班真係有思覺失調嘅人做顧問, 仲拍埋片去講佢哋幾咁認真。所以話, 佢哋啲宣傳真係令人睇到: 「吓?!」咁囉。

好彩嘅係, 呢啲嘢最後唔係純粹搵啲嘢嚟搞。幻覺同埋幻聽呢兩個原素真係同個遊戲玩法有實質關連。正如之前講, 你腦入面嗰把聲會俾到一啲Gameplay上嘅資訊你, 甚至嚮戰鬥中提醒你有人打你背脊。有時佢哋係純粹串你, 又或者係質疑你做嘅嘢。遊戲利用立體聲, 令玩家帶住耳筒玩時聽到啲聲, 真係好似係你腦海入面嘅聲音咁, 的確係幾特別。



純粹係講Feel嘅戰鬥系統

戰鬥系統好簡單, 你有輕、重攻擊、迴避同埋擋格, 仲有一個慢動作系統, 儲夠氣就可以出。擋人時如果時間剛好, 就可以做出反擊。開頭玩時單對單咁打, 真係有點悶。隨住玩落去, 開始面對住更多敵人, 同埋見到其他種類嘅敵人, 個戰鬥先開始變得有趣返啲。但係我一直期待佢會出現嘅難度, 好可惜, 冇出現到…佢真係一隻睇故事重要啲嘅遊戲。就算係玩Hard、一個打幾個, 啲敵人都唔會太有挑戰性。有時仲會見到佢哋企曬嚮度排隊, 等你殺咗佢啲同伴先出手。

啲Boss戰都係玩記佢攻擊模式, 迴避、擋格、搵最佳出招時間。扣到咁上下就入下一個階段, 佢可能係會用多咗招、打快咗、叫人幫拖之類。都係大路嘢, 冇咩特別之處。

佢仲有啲我個人感覺係幾反智嘅系統, 例如一個打幾個時冇得手動轉目標, 個鏡頭一定係鎖住最近你嗰個。(更正:有得轉, 原來係Mouse 4同5, 唔怪得…) 佢啲敵人係你行到埋去, 又或者係殺咗之前嗰一隻後當場生出嚟, 生出嚟個位置隨時有可能就係你旁邊。我唔知試過幾多次佢生出嚟就企正我隔離, 反應都未來得及已經俾佢打咗兩嘢。

如果唔睇呢啲問題, 淨係講佢個戰鬥帶俾人嘅感覺, 的確係唔錯。主要都係因為主角嘅動作好流暢同埋好真實。打落敵人度, 佢哋嘅反應加埋畫面上嘅效果, 完全表達到武器嘅重量感。成功咁使出反擊嗰吓雙刃交鋒嘅音效, 再加埋半秒嘅慢動作, 隨之而來係你斬敵人幾刀, 再開個慢動作出招狂斬到隻嘢死為止, 呢種快感唔係隻隻遊戲都可以咁清晰咁傳達到俾玩家。

點解我啲幻覺都冇咁有用?

唔係打嘢時, 基本上大部份時間都係由Point A去Point B, 途中有幾度門要想辦法開咁。好多時候啲謎團都係要你利用Senua嘅幻覺去搵出啲紋章嘅所在。而啲紋章符號, 其實係場景入面其中一件或者多件物品, 當你企嚮某一個角度望過去時所組成。如果你有玩過《Batman: Arkham City》, 呢個基本上就係將Riddler個Mini-Game發大嚟搞嘅版本。

除咗呢個基本解謎方式之外, 佢仲有啲比較獨特嘅設計, 好似係個場景會因應你由唔同方向穿過度門而改變, 又或者係你要穿越時空去唔同時間改變啲嘢。啲謎唔會太難搞到你過唔到關, 但係又唔會太易, 當正你係個白癡咁(咳! Uncharted 咳!)。8個小時嘅旅程入面, 佢有足夠嘅改變去保持遊戲新鮮感。我個人係接受到呢類型嘅玩法, 但係亦有人可能覺得走來走去搵辦法開門係太悶。呢個就要睇你嘅喜好喇。

Ninja Theory叻叻豬啦!

艾殊推薦

艾殊推薦!

總結嘞。呢隻遊戲好明顯係一隻有Heart嘅作品, 題材同埋表達方式亦都好新鮮。佢呢種直線:「行->打->睇故事->行」咁嘅玩法係比較適合香港, 尤其係Console嘅玩家(如果香港Sony肯出俾你玩的話)。對於我嚟講佢似係一個體驗多過似係一隻遊戲, 但係嚮呢8個小時嘅體驗入面, 我覺得係可以值回佢$175嘅叫價, 而且係得到足夠嘅娛樂。Ninja Theory所講嘅Indie AAA, 真係俾佢實現到! 叻叻豬!

支持我哋繼續做免費內容, 請讚好同分享, 每一個Like同Share都可以幫到好大忙! 感謝! Follow我哋Facebook Page, 睇更多有關遊戲資訊啦!

Editor Rating
 
畫面
8.5

 
音樂
7.0

 
聲效
9.0

 
系統
7.5

 
個人傾向
7.5

艾殊哥無定向評分:
7.8


總結
 

呢隻遊戲好明顯係一隻有Heart嘅作品, 題材同埋表達方式亦都好新鮮。佢呢種直線:「行-> 打-> 睇故事-> 行」咁嘅玩法係比較適合香港, 尤其係Console嘅玩家(如果香港Sony肯出俾你玩的話)。對於我嚟講佢似係一個體驗多過似係一隻遊戲, 但係嚮呢8個小時嘅體驗入面, 我覺得係可以值回佢$175嘅叫價, 而且係得到足夠嘅娛樂。Ninja Theory所講嘅Indie AAA, 真係俾佢實現到! 叻叻豬!