遊戲介紹
267 views 0 comments

Gigantic – 驚人消息! 呢個世界除咗LoL同鬥陣, 原來仲有其他遊戲!

by on 八月 11, 2017
 

遊戲名稱 : Gigantic
遊戲平台 : PC, Steam, XBox One
遊戲類型 : 動作策略
開發廠商 : Motiga Inc.
支援語言 : 英文、法文、德文

好鬼憎而家啲人見親兩Team互相玩策略打對方嘅就當係《LoL》, 見到有人物揀嘅對戰遊戲就當係《Overwatch》。呢個世界仲有大把好嘅免費遊戲…唔係淨係得最多人玩嗰幾隻。隻 《Battleborn》係其中一個明明係一隻好遊戲, 但係就死得好慘嘅例子。

呢隻《Gigantic》一出嘅時候, 用咗好多心思去解釋佢隻遊戲同《LoL》、《DOTA》、《Overwatch》有咩唔同。結果一出之後, 頂, 班死剷又係當佢係「抄《LoL》」、「溝水版《Overwatch》」… 睇都未睇清楚就Dismiss佢。

你可能會覺得好奇怪, 原來呢個世界仲有其他遊戲架咩? 但請認真咁聽我講一次:「呢個世界上仍然有其他好玩嘅遊戲, 個名唔係叫做《League of Legend》或者《Overwatch》…仲要係免費的。」

係, 《Gigantic》係兩隊人玩策略, 係有得揀用邊個人物, 人物又有得升級, 升完又有得揀技能。但係佢冇「Lane」、冇「Tower」、冇「Jungle」、 亦冇「Minion」。佢有嘅係一套自己嘅系統… 你同敵人隊伍各自有一隻巨大守護獸, 你個目的當然就係要打死對方隻嘢啦。咁又當然要殺對方隻守護獸, 並唔係成堆蟻咁去打佢就得。因為Sor9ry, 守護獸本身係無敵嘅, 你要可以對佢做到傷害, 就要靠你自己隻守護獸幫手。但係又唔好意思喎, 守護獸係要你幫佢「叉電」, 叉滿咗先肯出手架喎! 於是乎你同你隊伍就要同人鬥快叉電夠100%。

點樣先叉到電呢又? 最基本嘅方法就係嚮地圖上面指定嘅位置度生隻怪獸出嚟, 只要有隻怪獸嚮度, 佢就會自動咁幫你叉電。於是乎你就諗到嘞, 兩邊隊伍就一方面要保護自己啲怪獸, 另一方面要去殺對方啲怪獸。但係又好得意架喎, 啲怪獸唔單止係會同你一齊打人, 佢哋亦有特殊技能, 好似係幫範圍內嘅同伴補血咁。帶邊一種怪獸出去, 係由你賽前事先決定。佢自己本身又會吸食日月精華咁由BB長大成人。大人又會多HP啲, 好打啲咁。

除咗呢個方法叉電, 你殺到對方嘅人又或者怪獸, 佢都會增加你嘅電量。我玩《Overwatch》時最怕就係自己啲人一個一個咁衝入去死…呢隻遊戲入面, 除非你真係好想對方贏, 否則你就要識得唔好死、識得靠隊友同埋啲怪獸幫忙。

當你或者敵人拎夠100分, 隻守護獸就會出動去同人哋隻嘢打。呢個時候, 俾人打嗰邊隻守護獸就會暴露出弱點。於是乎攻嗰邊就要快快手嚮佢回復之前做夠傷害。如是者, 成功咁攻到人三次就算贏。

好似複雜咗啲? 聽落就好似係嘅。但係玩落, 由於隻遊戲個節奏十分之快, 地圖嘅設計又真係做得好好。兩邊一攻一守咁打, 基本上唔會有咩冷場, 打一場好少會超過30分鐘。只要你有玩過個教學, 基本上已經可以上場。仲有, 由於而家隻遊戲仲唔係太多人玩, 佢啲玩家都係一班好友善、好肯俾新手機會嘅人。呢點, 係我主要唔玩《LoL》同離開《Overwatch》原因…我只係想打機, 唔想俾人鬧。

之後我想講嘅係佢啲人物升Level揀技能嗰部份。一般呢類型遊戲升來升去你個人物都唔會有咩改變。你係攻擊力嘅就一味都係玩攻擊, 係做支援嘅就一味支援。呢隻你係可以因應戰況嚟揀點升, 你可以升到個人可以捱打得勁啲, 但係又可以升到佢變咗做範圍攻擊咁。

最後一樣要提就係, 呢隻遊戲個貨金系統都好公平。唔會吓吓咩都要你俾錢。如果你一次過俾兩舊水買隻Ultimate版, 佢之後出親所有新人物你都可以用到。不過你唔想俾錢的話, 用遊戲入面賺到嘅錢, 你都係可以解鎖啲人嚟用。有玩過Perfect World之前啲Free 2 Play遊戲嘅人都應該知呢間公司係用遊戲質數嚟吸引你俾錢, 唔係靠收埋啲嘢嚟威脅你要俾錢。