遊戲介紹
417 views 0 comments

《Agents of Mayhem》- 35小時後 – 遊戲評測 – 點睇?

by on 八月 21, 2017
內容
 
遊戲介紹
 

遊戲名稱 : Agents of Mayhem
遊戲平台 : PC, PS4, XBox One
遊戲類型 : Action
開發廠商 : Deep Silver Volition
支援語言 : 英文

Agents of Mayhem - 點睇?

開發商Volition經歷過兩次轉手, 第一次係當Interplay倒閉後, 佢哋加盟入THQ。一做就做咗13年。期間最成功嘅作品包括有《Saints Row》系列同埋《Red Faction》系列。

THQ倒閉後, Volition原本可能會係去咗EA、Ubisoft、或者係Take-Two手上。最後卻被Koch Media以二千二百萬美金高價買入, 歸納入Deep Silver品牌下。Ubisoft都只係出到五百四十萬。神奇嘅係, 呢二千二百萬只包括咗《 Saints Row》嘅版權。《Red Faction》就去咗Nordic Games手上。可見Koch Media對Volition同埋《Saints Row》呢個品牌係幾有信心同埋期望。

《Saints Row IV》嚴格嚟講都仲係THQ時代留下嚟, 過檔去Deep Silver之後推出嘅一隻。但係《Agents of Mayhem》就正正式式係Volition加入Deep Silver之後第一隻《Saints Row》系列嘅新作。

佢哋選擇唔做隻《Saints Row V》, 只保留返世界設定同埋其中一啲原素, 嚮玩法上嚟一次革新。我個人覺得係一個好嘅做法。但係對好多《Saints Row》Fans來說, 《Agents of Mayhem》係一個倒退, 而唔係一個將呢個系列帶上另一個層次嘅作品。

一定要有Multiplay? 一定要自創人物?

Agents of Mayhem入面十二個人物

Agents of Mayhem入面十二個人物

首先第一樣最多人投訴嘅係佢冇咗Multiplayer呢樣嘢。《Saints Row》系列咁耐以來都係一隻可以俾人玩合作模式嘅Open World遊戲。但係今次Volition就選擇咗唔做連線, 將目標專注於單人模式上。對於我呢個自閉仔嚟講呢個唔係一個問題, 我情願玩單機遊戲按自己速度同時間嚟玩。但係我亦明白到大家想要有合作模式, 同朋友一齊周圍搞事, 一齊殺NPC。呢個一直以來都係《Saints Row》嘅魅力, 冇咗係有點可惜。

另一樣令到好多《Saints Row》玩家不滿嘅係今集冇得自創玩家人物, 取而代之嘅係有十二個預設人物 (如果有預購十三), 你可以揀三個人出嚟去做任務又或者四圍走搞破壞。雖然你只係控制一個人, 但係你就可以隨時打打吓換人出嚟。由於每個人物有唔同武器、技能、同埋專長, 變咗打起來你就可以利用隊伍嘅能力去做出一啲Combo, 例如放一個範圍攻擊出嚟將敵人扯埋一堆, 換人, 放個減防, 再換人, 最後放一個炸彈嚮人堆中間爆炸。

組織隊伍真係好玩

組織隊伍真係好玩

佢咁多個人物又真係做得到每一個都有自己特色, 甚至有自己獨有嘅玩法。例如Yeti呢個角色平時係用一支噴冰嘅鎗攻擊人, 佢冇子彈限制, 但係支鎗就會一路用, 一路結冰。到完全結冰之後如果你用近身攻擊, 佢就會出一招向前一條直線咁嘅攻擊。Daisy呢個角色用支Minigun會過熱, 之後你要用個技能去冷卻返佢, 而嚮呢段期間, Daisy會行得快好多, 仲可以撞人嚟做攻擊。Scheherazade冇鎗可以用, 佢係純粹用刀斬人, 但係當你用物理攻擊個掣時, 佢係會拋把刀出去敵人度然後瞬移到敵人身邊。

呢個設定我覺得係比起只得一個人可以用多種唔同鎗好玩。因為你可以計劃你隊Team用咩人, 佢哋之間有咩可以互利嘅技能。一路打時又可以轉唔同玩法, 令到戰鬥變得刺激同多變化好多。

每個人物又會升Level, 升完會有新嘅技能。佢又有啲叫做Legion Tech嘅嘢, 你可以透過做任務取得一啲藍圖去製造出嚟, 做完之後你可以將佢加落去啲技能上面去增加你個人物某啲數值又或者追加效果。要認真玩的話, 單係每個人物點升法、點裝備啲咩都有排你玩。



打唔完嘅Side Quests

地圖唔大, 但好多任務…

地圖唔大, 但好多任務…

反而佢哋沿用返《Saints Row》嘅部份先係隻遊戲嘅弱點。佢啲所謂副任務, 有啲會即時生成咁做出嚟。你一打開個地圖睇, 係有好多個任務出現呀。但係種類就好少, 仲要係完全冇挑戰性嘅, 例如要你撞爆人架一吓就爆嘅車、打一隊得三個人嘅隊伍、又或者係行埋個炸彈度禁個E掣之後射爆佢。有時佢會搞到Bug咗, 生出嚟個地方完全冇敵人, 又或者係困住咗個敵人嚮場景入面。

打完呢啲任務你可以得到嘅係錢同埋整嘢嘅物資。其實你就算唔做呢啲Content, 就咁做普通任務都會攞夠有突。所以想唔到佢除咗係想隻遊戲會拖長啲之外點解要做呢堆嘢出嚟。

其他唔係即時生成, 又唔係故事嘅任務種類都唔見得好得去邊。當中包括有大家見慣曬嘅跑步過Checkpoint、限時揸車到終點、防守敵人攻擊一個地方、攻入敵人陣地破壞之類…

令我覺得最搵笨係, 呢啲任務就算你清咗, 佢都會留返嚮個地圖上面, 你係可以再玩。我開頭仲以為係我隻Game冇Save到我最新進度…點知再玩多次睇吓先發現原來佢係冇得清嘅。佢啲任務獎賞係要講抽獎運, 睇吓你抽唔抽得中最正嗰件, 例如人物、武器同車嘅Skin。

佢啲基地你打咗返嚟係會無啦啦在完全冇警告、冇叫你去防守下俾人搶返轉頭。一打開地圖睇, 頂?! 又係嗰個位, 又要我再打過同一個地方?! 更大鑊者, 呢隻遊戲嘅敵人種類唔多, 而場景種類又來來去去得幾款。你玩得咁上下就會發現次次都係入嗰個基地場景, 做同一系列嘅嘢, 打同一系列嘅敵人, 之後出返嚟就完成個任務咁。唯一有點唔同嘅就係基地個入口位置, 好彩隻遊戲個戰鬥係算做好玩, 如果唔係, 我相信我好快會放棄。



世界末日機器

唯一我覺得比較有趣係你嘅死對頭嗰邊久唔久會放一啲大型破壞城市級嘅機器出嚟。例如有支太空Laser、又或者係一個大型黑洞之類。呢啲真係好久唔久先見到一次嘅任務通常都係要你去清曬附近啲人、Hack件嘢、破壞某啲嘢咁。雖然到頭來都係用返同類型玩法, 但係因為你入咗呢啲嘢嘅範圍內, 佢會變到個天又黑曬、又大風、又有啲警號一路響住、啲NPC又驚到周圍走咁, 真係好有末日Feel。

視乎件機器係咩種類, 佢又會係咁有啲範圍攻擊出現嚮你四周圍。俾佢打中真係會好痛的, 所以做呢啲任務都會好鬼混亂, 又要掛住打嘢、又要記得避開啲攻擊。係有呢啲Moment先令到我覺得自己玩緊嘅似返個維護世界和平嘅戰隊。

故事模式

我已經隋入愛河啊~河啊河啊~

我已經隋入愛河啊~河啊河啊~

好彩嘅係啲故事任務有夠多變化, 場景唔係來來去去一兩個。佢冇《Saints Row》玩得咁誇張又落地獄又剩咁, 但係都有幾個任務啲情節係去到一啲好唔同嘅地方。而啲大佬級人物都算做得幾有趣, 又未至於話係好好咁, 起碼打起上嚟唔會覺得屈機或者悶。

玩開《Saints Row》嘅可能會覺得佢個故事唔夠荒謬、唔夠玩嘢。但係我好喜歡佢每個人物都有鮮明嘅性格、每個人物都有一段過去, 有各自加入成為Agents of Mayhem嘅原因。我鍾意睇隊員之間啲互動, 睇佢哋點解聚埋一齊變成為三人小組嘅戰隊。又勁鍾意老總Persephone呢個角色, 仲有Fortune…都唔錯 (LOL) ; 啲奸角又係個個都古古怪怪諗嘢諗大咗咁, 個故事都算係幾好睇嘅。

總括嚟講嗰三十幾個故事任務, 加埋二十幾個人物個別任務, 我係覺得OK嘅, 唔好要求佢會有咩好大變化嘅玩法或者深度。畢竟, 始終個重點都係嚮個戰鬥系統上。

其他問題/毛病

遊戲個畫面唔可以講得上話係「靚」。Ark個場景無啦啦勁用Bloom同Blur, 搞到好似搽咗啲「花士檸」嚮個Mon上面咁。唔靚都算, 佢個引擎仲要係鬼咁大咬。以呢啲咁嘅畫面, 一般嚟講用1080ti應該係可以行好高解像度同開盡啲效果啦? Sor9ry, 唔得…行1080p 60 FPS都有挑戰, 要熄咁啲嘢先得 , 尤其係Nvidia HFTS, 白癡嘅, 用佢即刻扣你20 FPS。

介面設計我覺得佢做得好差。佢個Legion Tech系統, 明明一個介面可以做曬, 佢係要分開佢嚮兩個唔同部份, 搞到你要兩頭跑, 靠記憶咁去裝備同埋製造啲物品出嚟。

打起上嚟你俾人打中嘅效果唔夠明顯, 有時連自己俾人扣剩啲HP都睇唔到, 搞到我時常要望向左下角睇自己個防護罩爆咗未。人物技能有冷卻, 但係個倒數就收埋嚮右下角個細細嘅圖上面。打緊時邊有時間望落去…所以都係禁吓個掣睇吓出唔出到, 出唔到就算嗰隻。

我玩嘅35小時入面, 我試過真係Bug到要退出隻Game重開嘅有兩次。一次係個人物淨係識得行同開鎗, 其他咩都做唔到。一次係佢停咗嚮個Loading畫面冇郁。除咗呢兩個比較大嘅問題之外, 仲有啲小毛病咁, 唔係啲令到你玩唔到落去嘅嘢。所以對我嚟講都唔係太大問題。

總結

如果隻遊戲係唔好玩, 我又點會放35小時落去呢? 雖然有咁多毛病, 但係佢真係做得好玩嗰吓死。最起碼我好喜歡佢啲人物有咁多變化, 又有好多組織性嘅嘢玩。雖然我已經係去過同一個場景幾百次, 但係個戰鬥又真係過癮, 令我玩唔停手。佢仲有好多濕濕碎嘅系統, 好似係解鎖新車、打VR任務嗰啲, 加埋加埋令到隻遊戲變到好有份量。但係呢啲嘢係唔係你想要嘅, 就睇你自己口味啦。

我只可以代表我自己講, 呢$331 我覺得係返曬本, 打完35個鐘之後都好滿足, 可以準備下一隻Game嘅來臨。

更多《Agents of Mayhem》片段:
【首30分鐘遊戲片段】: https://goo.gl/z9RLQY
【Rama (弓箭手) 解鎖任務】: https://goo.gl/fnK72x
【Johnny Gat 解鎖任務】: https://goo.gl/Kmmuob
【其他遊戲資訊】: https://goo.gl/2eiQSi

Editor Rating
 
畫面
6.0

 
音樂
6.0

 
聲效
6.5

 
系統
7.5

 
個人傾向
7.5

艾殊哥無定向評分:
6.9


總結
 

如果隻遊戲係唔好玩, 我又點會放35小時落去呢? 雖然有咁多毛病, 但係佢真係做得好玩嗰吓死。最起碼我好喜歡佢啲人物有咁多變化, 又有好多組織性嘅嘢玩。

我只可以代表我自己講, 呢$331 我覺得係返曬本, 打完35個鐘之後都好滿足, 可以準備下一隻Game嘅來臨。