艾殊網誌
285 views 0 comments

Vive又減價喇, 係唔係即係買得VR?

by on 八月 22, 2017
 


睇見Steam個VR遊戲列表個死樣、Oculus玩到好似就嚟執粒咁、Vive又要減價促銷、Sony又出咗名見到唔對路會即刻停Support…到底呢個世代嘅VR係唔係已經玩完?

我自己已經成半年冇買過、玩過啲VR遊戲。自從PSVR推出, 玩過吓隻《Batman: Arkham VR》之後, 無論係PC定係PS4, 我都見唔到有邊一隻遊戲係可以吸引到我去買。隻《Super Hot》…開頭又唔肯出落Vive, 之後出又要另外俾$168買多次, 唔制。隻《Star Trek: Bridge Crew》又咁著重同其他人玩Coop, 我冇咁多Friend好似我咁傻一早就買曬VR, 睇完人玩, 其實都係一隻冇咩深度嘅Game… 睇返Steam條Top Seller List, 同半年前差唔多, 都仲係得嗰幾隻做得起…

我尋日無啦啦挑起條筋走去開個Steam VR睇吓。嘩, 原來呢幾個月佢加咗好多嘢嚮你個VR空間度。之前你係得一間房, 咩都冇。而家佢做到係好似你自己間屋咁, 可以任你設置傢俱。玩啲VR Game而家係會解鎖到某啲物品俾你用嚟佈置屋企, 又或者去改變你VR世界入面個樣… 我Unlock咗個《Raw Data》個機械忍者個頭, 而家用緊, 佢仲俾我自己Tune埋色, 又有隻Portal入面嗰隻機械人嘅公仔, 我可以戴住嚮頭上面, 又或者放嚮屋企個書架。係囉! 佢而家做到你可以自己開間VR Room, 然後啲朋友可以加入嚟一齊玩。佢又加咗啲工具俾你自己畫嘢, 你畫完舊3D物件, 可以拎起佢嚟睇, 又或者放置嚮自己屋企。好鬼多Social上面嘅Feature。

另一個好大改動嘅係隻《Bigscreen》, 你而家真係可以約埋朋友一齊去VR戲院睇Netflix或者睇戲。每個人入到個VR世界都有自己一個Desktop, 你可以就咁用自己個Desktop同人連線打機, 又可以將自己個Desktop放大嚮場景入面個大銀幕上面, 等大家一齊睇。嚮個Virtual戲院入面, 你可以傳送去坐唔同位置, 佢又加咗啲NPC嚮度同你一齊睇戲咁。我嚮度睇YouTube, 唔記得咗自己原來嚮間戲院入面, 突然間眼尾見到點解有嘢郁嘅? 先醒起, 係喎, 前面坐咗兩件NPC! 死嘢, 咪郁來郁去啦! 佢當然亦有得俾你自己設定自己個樣, 個設定介面仲係好似你拎住塊鏡咁照住自己。

又真係好過癮喎, 呢啲嘢! 都玩咗我成30分鐘架… …… … …… … 我明白佢想開發玩家互動呢味嘢, 等大家互相去娛樂對方呀。但係, 呢個世界真係咁多人有VR? 就算係, 3唔識7條友, 我做咩無啦啦會想同佢坐嚮間房度傾計? 個死人VR個收音位置, 搞到係人都好似Darth Vadar咁, 啲抖氣聲鬼咁大聲…兩個麻甩佬, 嚮VR入面一間房, 一齊大聲抖氣, 一齊拋個沙灘波…就算係我咁變態都過唔到自己嗰關啦~

呢個我諗正好係Highlight咗現今VR個情況…佢真係有好多得意嘅概念, 好多唔係VR冇辦法體驗到嘅嘢。但係呢啲嘢, 都係一啲玩幾個字就收埋嘅Gimmick。一講到遊戲方面, 點呢? Valve就一早講咗唔會插手, 只會睇住啲人繼續做垃圾。Oculus俾完頭一輪錢出去買完一輪獨家, 發現原來推唔到人買佢部嘢, 又放棄埋。嚟緊所謂「大作」係《Fallout 4》、《Doom》同埋、《Skyrim》, 幾隻舊遊戲。

呢個前途, 賣$6999… 你自己諗。