艾殊網誌
170 views 0 comments

《死Newbie!》S1E4 : 決戰骨精強

by on 八月 30, 2017
 

接上回

施襲者嘅攻擊並冇停落嚟, 第一刀斬中之後, 舉起手又準備再斬一刀。A仲未取回平衡, 又睇住把劍直斬緊去自己嘅頸部位置, 情急之下, 佢張開冇受傷嗰邊隻手向前一推, 唸出一句咒語。從佢手掌中發出一吓一閃即逝嘅光。施襲者俾佢突如其來嘅呢一吓推開, 成件咁飛起往後跌咗幾呎之後先落地。聽到對方跌落地時發出「噹啷噹啷」咁嘅聲音, 佢哋先嚇然發現, 襲擊佢哋嘅竟然係一隻骷髏戰士。

呢種俗稱為「骨精強」嘅骷髏戰士同死靈系巫師召喚出嚟嗰隻好唔同, 呢啲骨仔都冇主人, 又唔會聽任何人嘅指示。佢哋冇思想、冇感情, 只有一種係生物都會走去攻擊嘅慾望。冇人知呢啲野生骨仔係點形成, 大家都斷估係因為有啲邪靈死咗之後唔甘心, 走去搵啲死屍嚟附體。而咁啱俾佢搵著啲已經化成為骨頭嘅人, 佢哋就變成野生骨仔。

隻骨仔同埋A分別掙扎住咁起身。A腦海中閃過教授講過有關骨仔嘅事; 由於冇血冇肉, 用普通嘅利刃、又或者火冰等攻擊, 對佢哋嘅作用都唔大。佢哋係一件會行會走, 又冇痛楚感覺嘅怨念。無論你點猛烈去攻擊佢, 只要佢仍然可以企得返起身, 佢都會一直係咁攻擊你, 直到佢殺到你為止。

A心知道今次大鑊, 要打就一定要靠佢運用啲死靈系嘅魔法去收服隻骨仔, V啲原素魔法大部份都唔會有作用。但係佢自己學咗嘅嘢, 又有邊樣嘢可以嚮呢個情況之下用到? 佢一時之間又冇辦法諗到。

「現.婆.音!!~~」V唸起魔法來, 召喚出啲火原素, 將佢哋聚集做成三個火球, 漂浮於佢手心幾吋之上。V將手向前推出, 火球一連串咁對住隻骨仔飛出去。啲火球以高速打落隻骨仔度, 爆出咗啲火花同埋煙霧, 但係對隻骨仔就完全起唔到阻嚇作用, 只係整燶咗佢啲胸骨, 發出咗一陣香濃嘅燒烤味。

見自己啲魔法起唔到作用, V又再「現.婆.音!!~~」咁, 出多三個火球, 但係又一樣咩作用都冇。佢如是者咁「現」咗幾吓「婆音」, 唯一做到嘅就係成功咁將隻骨仔嘅胸骨好均勻咁燒燶曬。

「呢劑大電視喇…」佢心諗。佢已經因為連續咁用得太多魔法, 搞到回唔切氣, 有點想窒息咁嘅感覺。呢種現象其實好常見, 尤其係嚮啲唔識控制自己能力嘅新手身上。學校教, 每逢出現呢啲情況, 你都必須要通知你嘅同伴, 但係因為你本身已經冇氣, 講唔到咁長篇嘅嘢, 所以你只需要叫聲:「OOM!」咁就得。點解係呢三個英文字呢? 學校冇教…有人話佢係「Out of Mana」咁解, 又有人話係「Oh! Oh! Man~」, 亦有人話係「OoooOoooo Missed!」。各有各講, 唔知邊個先啱。不過最緊要嘅係, 叫完「OOM」之後, 係要馬上坐低打坐, 清除雜念, 控制返自己嘅呼吸。如果唔係, 好易會就咁斷氣。

隻骨仔嗰頭一企定起身, 嗰頭即刻就側曬頭咁向佢兩個衝埋嚟。佢把短劍高舉頭上, 一面走一面亂咁揮, 如果佢識得出聲, 呢一刻佢一定係嚮度大叫緊:「有殺冇賠!」

見到骨仔來勢兇兇, V又「OOM」緊。A唯有重施故技, 再用返同一個咒語。隻骨仔又好低B咁照食返同一招, 俾啲魔法推到成件彈開, 往後飛咗三呎, 一屁股咁就坐咗落地。

A趁呢一刻嘗試使用光球魔法去引開隻骨仔注意。但係雖說骨仔係冇思想同感覺, 不過佢哋唔多唔少都仲有返點智慧。呢啲花巧嘢冇辦法可以呃到佢。隻骨仔一於懶理, 連望都冇望多一眼啲圍住佢轉嘅光球。爬返起身, 又試舉劍衝過嚟。

A再次使出個推開人嘅咒語, 但係都話隻骨仔唔係蠢,  今次佢馬上收起攻擊, 一個側身就迴避咗A嘅魔法。同時間好鬼瀟灑地, 回身再橫劈出一劍向A頭頸嘅方向。鋒利嘅短劍劃破空氣, 啲小說佬會話係「啵」咁一聲地, 急速接近A嘅命門。來唔切做得啲咩, A只有硬退一步, 一個唔覺意就失去重心往後仆低。

佢呢吓, 雖剛好迴避咗個攻擊。但係佢就跌咗嚮地上, 冇辦法可以再迴避下一輪嘅攻勢。眼見骨仔舉刀, 準備再斬落嚟。A伸手出去再使出魔法。「砰砰砰」連續三吓魔法攻擊, 全部都被骨仔相繼避開。

A個膊頭傷勢嚴重, 見到血已經沾染咗佢半邊身體, 佢亦開始感覺到愈來愈冇力。流汗不斷, 原本已經係青青嘅面色, 開始變成慘白。「估唔到我係要死嚮呢度…」佢連手都冇辦法再舉高, 只有等待骨仔下一刀斬落嚟。「會唔會好痛架呢?」

未完…待續