艾殊網誌
328 views 0 comments

《死Newbie!》S1E3: 賴嘢~

by on 八月 29, 2017
 


接上回

Dark Elf嘅城鎮, 係處於暗黑森林入面一座叫做「畢畢勒山」嘅地底下面。城鎮嘅入口係一個天然形成嘅山洞, 為咗慳啲功夫, 佢哋冇特別去整啲咩裝飾, 又或者好宏偉嘅大門。當你去到佢哋個城外面, 只會見到一窿咁, 旁邊企咗幾個著住盔甲嘅守衛把守。佢哋嘅盔甲都係用附近一種帶有紫色嘅金屬礦物做成, 而且都好興做到好鬼多層次, 好鬼多尖角, 好多線條上面嘅裝飾。因為佢哋個理念係, 就算唔打得都要睇得。嚮啲守衛嘅盔甲心口位置係刻有Dark Elf族嘅徽章: 一隻唔知係狗定係狼嘅生物頭像… 唔係話我冇做Research呀, 而係連班Dark Elf自己咁耐以來都唔係好知呢個徽章嘅來源, 同埋到底畫緊嘅生物同佢哋有咩關連。呢幾百年來, 啲所謂學者都不斷在研究呢一個環節, 但係大家對於呢啲重要嘅細節則一直不能達成共識。

入到山洞入面, 係一個十分漆黑嘅環境。因為Dark Elf本身有夜視, 所以佢哋唔需要特別去做啲咩照明系統。佢哋只係加咗幾把火把俾啲冇夜視嘅遊客用, 仲要係因為俾人告過先咁做。

去到洞穴最深處, 你會見到有兩條人龍企咗嚮度面對住山洞盡頭, 唔知佢哋嚮度等緊咩。細心觀察下, 你會發現原來由於個城鎮係建嚮地底, 所以佢哋就要嚮呢度建造兩架昇降機嚟俾大家出入。但係兩架昇降機係用木造, 而且個載重量只能夠容納到三個人, 再加上近年多咗好多遊客嚟呢度觀光, 搞到要入城就好麻煩, 往往都要排隊等上幾個字。

入城後你會先經過一個檢查站, 所有唔係Dark Elf種族嘅人都要經過一條旅客通道, 交出通行証同埋經過守衛嘅查詢先可以入城。由於近年 Dark Elf同人類因為土地嘅爭議搞到反曬面, 而Dark Elf本身係一個好鬼陰濕小氣嘅種族, 所以佢哋冇就咁禁止人類出入。反而, 佢哋特別設置咗兩個帳篷嚮呢個檢查站度, 一個係男用, 一個係女用, 就係用嚟俾呢啲入城嘅人類入去進行詳細檢查。經過嘅人都會聽到無論係男定係女嗰邊, 都會不時咁傳出啲痛苦嘅叫聲。冇人知到底入面真係發生緊咩事, 但係就可以大概咁想像得到。

經過埋呢個關卡之後, 你就正式進入咗Dark Elf嘅主城「拉拉托夫耶絡夫」, 馬上迎接你嘅, 係一條康莊、廣闊嘅大街。嚮呢條必經通道嘅兩旁都興建咗好多商店, 主要都係以售賣紀念品為主。呢條人來人往嘅路上, 你會時不時咁見到Ogre小販嚮度擺賣好似燒青蛙呢類咁嘅小食。

沿住呢條大路一直行, 去到一個圓形廣場旁邊有一間附近一帶好出名嘅叫做「飲大咗」嘅酒館。呢間酒館, 無論係幾時都係咁多人, 啲客人由一開鋪就嚮度打躉, 直到收鋪。第二朝同樣時間又會嚮度出現, 簡直就好似係店主請佢哋返嚟扮客撐場嘅咁。諗真啲, 班友好似由頭到尾都係拎住同一杯嘢嚮度扮飲咁, 可能真係請返嚟做媒嘅多…

A曾經約人嚮呢度門口等好多次, 但係從來都未試過入去幫襯。今日佢就應同學嘅邀請嚟到呢度同其中一個有錢仔同學慶祝生日。

「生日快樂!」一個面型方方, 頭髮後梳, 兩邊面有留海嘅男子舉杯大叫道。圍埋坐嘅一行十多人, 包括A在內, 都一齊呼應咁舉杯向壽星致賀。

坐嚮A旁邊嘅係一個名叫Pisilavia Jon Edgar La’Void嘅年青人, 唔好望住我…呢個係習俗嚟, 每個出生於呢個世界嘅人都唔可以有相同嘅名稱。於是乎佢哋改啲名就愈來愈難發音, 愈來愈長。呢個叫做Pisil……….都係叫佢做P算…P係A嘅同年班、同學系同學。呢度坐埋嘅一檯人, 應該都係得佢兩個屬於死靈學系嘅學生。

P一口氣將手上嘅啤酒飲完, 發出一吓滿足嘅感嘆聲音, 將杯重重地用力放在桌面上:「嗚呀~ 正呀!」

佢回頭過來望向A, 見佢拎住杯嘢嚮度發呆, 伸出一隻手指嚟隊落去佢杯酒度試下個溫度話:「做咩呀?杯嘢暖咗呀?」

「冇呀…」A完全冇在意P隊隻手指落去佢杯嘢度。反正佢都冇想過會去飲… 佢唔係嗰種喜好飲酒應酬嗰種人。佢出席呢啲場合通常都係俾人迫佢去, 又或者俾吓面咁。

P完全咁無視咗A嘅答覆, 繼續暢談暖咗嘅啤酒有幾噁心。而A已經開始封閉咗自己隻耳, 開始想緊種種唔同事情。

突然之間, 有一名中年肥肥地嘅Dark Elf大力咁打開咗酒吧嘅門, 製造出一吓好大「砰!」一聲。嚇到大家不約而同咁望向佢個方向。只見佢滿頭大汗, 好緊張咁, 向住酒吧入面嘅人群, 舉高雙手大叫:「暗黑Bear Bear熊又襲擊人喇!」叫完之後, 冇等任何人作出反應, 佢自己繼續好慌張咁走去下一間店鋪度踢開佢哋度門, 叫埋同一句說話… 佢條褲已經跌到去露出一條深深黑色屁縫嘅地步, 但係佢都懶理, 如是者一路沿住條大街走落去, 逐家逐戶咁發佈呢個消息。

酒館入面嘅人聽到呢個消息之後引起咗一陣騷動。A等一行人各有唔同反應, 有人對Bear Bear熊又試襲擊而覺得驚惶、有人因為當局無能力阻止Bear Bear熊襲擊而感到忿怒。A自己嘅感覺就更加複雜, 佢前一段時間先遇上Bear Bear熊, 而且成功咁逃脫。雖然佢哋返到城後馬上通知啲守衛暗黑Bear Bear熊出沒嘅位置, 但係當守衛去到事發現場後, Bear Bear熊當然已經走咗。

自從嗰次之後, A同V都好勤力咁苦練魔法。希望有一日即使再碰到暗黑Bear Bear熊, 佢哋都唔駛再落慌而逃, 可以堂堂正正咁同佢打過。於是乎, 佢同V兩個就開始膽粗粗咁去離開個城鎮遠啲嘅地方打獵。

佢哋由個城鎮一直沿住山腳向東走, 每日走遠啲咁, 終於有一日去到一個沼澤地帶。個沼澤好鬼大霧、好鬼臭、又鬼咁多蚊同埋其他飛行昆蟲。嚮呢個久唔久啲水深會去到過腰嘅沼澤度緩緩向前, 佢哋個目的係想搵到一種叫做「多多野蟲」嘅生物。因為佢哋聽講過武器屋個老闆話呢隻多多野蟲嘅腳係用嚟做匕首嘅好材料。由於Dark Elf城嘅人都係偏好用匕首, 所以呢啲蟲腳都一直好缺貨。如果佢哋可以打到啲蟲腳返去, 老闆就會用高價嚟同佢哋買咁話。

佢哋如是者嚮呢個沼澤度搵咗幾日…俾啲蚊咬到豬頭咁, 都只係見到啲甲蟲同埋大蚊呢啲一吓火球就K.O.佢嘅生物, 冇咩挑戰性。直到有一日, 佢哋來到沼澤入面一個無俾水覆蓋住嘅泥地度, V首先發現到一啲好奇怪, 一排一排咁圓形嘅腳印。想起多多野蟲嘅構造, 佢哋都同意呢啲腳印如無意外就係多多野蟲留低嘅。呢個發現, 令到佢哋突然間精神曬。好興奮咁就跟住啲腳印繼續前進。

都唔知行咗幾耐, 佢哋突然聽到有一啲「嘰嘰」聲來自前面不遠處。離遠隔住啲霧望過去, 好似就正係有一條多多野蟲嚮度掘緊地搵嘢食。

為免打草驚蛇, V馬上拉A埋去山腳旁邊嘅一塊大石後面, 鬼鬼鼠鼠咁望清楚確定目標的確係一條落單嘅多多野蟲。以佢兩個人嘅實力, 要打贏應該唔會太難。佢哋兩條友都冇盔甲保護, 又鬼死咁脆弱。所以最緊要嘅係唔可以俾條蟲埋到佢哋身。

「Yo! 我哋咁打…」唯恐自己太大聲會驚動到條多多野蟲, V細細聲咁同A講出佢嘅作戰計劃。佢指手劃腳咁講完一輪, A又點頭又細細聲咁指手劃腳講幾句, 兩人相討咗一陣, 決定咗點打, 互相點吓頭就準備衝出去攻擊條蟲。

說時遲那時快, 佢哋剛想起身嘅時候突然間有人從後襲擊佢哋, 一把短劍「嗖」一聲咁向V嘅頭上劈落嚟。於電光火石間, 睇住把劍距離V嘅頭顱只有幾吋距離。在驚恐情況吓, A猛然想起身就向前撲向持刀者。佢一時醒唔起自己著住一件長袍, 隻腳踩住咗自己件袍, 一個冬瓜咁就碌向V個方向, 剛好將佢推開, 避開咗被人劈頭嘅命運。但係把刀嘅來勢並冇停落嚟, 順勢斬落去, 剛好就劈中咗A個膊頭。只感到一陣劇痛加上自己嘅鎖骨同硬物碰上時回傳嗰一種麻麻的感覺, A不由自主地苦叫了一聲。

未完…待續