艾殊網誌
318 views 0 comments

《死Newbie!》 S1E1 : 暗黑Bear Bear熊

by on 八月 23, 2017
 

話說嚮一個遙遠嘅國度, 有一男一女。男嘅個名叫做Asilias Von Burler McGuffy, 女嘅叫做Vilias Sulenzo Masuzuki II。為咗之後方便我唔駛記住佢兩個個名, 我叫佢A同埋V。

A同V出生於一個處於暗黑樹林入面嘅一個城鎮。兩人同屬於一個叫做Dark Elf嘅種族。呢個種族最出名嘅係佢哋可以嚮完全冇太陽環境下生活都可以曬得黑黑的。另一樣冇咁出名嘅係, 佢哋呢個種族嘅人一般嚟講都係比較懶, 唔願點做運動。所以佢哋都係比較喜歡匿埋嚮屋企研究魔法。而且研究親都係啲置人於死地嘅攻擊系魔法。

「點解我係Dark Elf?」A望住一隻反肚瞓咗嚮地嘅大甲蟲屍體, 突然問道。

「唔通做High Elf呀?」V一邊用把匕首挖隻甲蟲嘅眼睛出嚟一面回應:「佢班友神高神大, 但係又著住條短褲仔。堂眉又粗到王小虎咁…」

「咁我可以係人類架嘛!」A不滿地投訴。

「人類喎! 我去搵你…我會俾啲守衛打架!」V想將佢挖出嚟成個網球咁大粒嘅甲蟲眼球放落佢個斜孭袋入面, 但係個袋已經袋得太多對眼球, 放唔落。佢夾硬想塞埋呢隻眼球落去, 唔覺意用力得滯, 壓爆咗袋入面其中一隻眼球。只聽到一吓濕潤嘅「Blet」一聲, 隻眼球入面啲黃色液體流曬出嚟, 從佢個袋嘅底部漏出, 沾污曬佢條白色裙同埋對鞋。

「小! 係咪呢!」V將自己失誤遷怒於A身上: 「無啦啦你搞咩身份危機呀?」佢望住自己條裙上面嗰塊黃紅色、夾雜住一啲眼球碎片嘅污漬。為免自己啲白色嘅長髮都被沾染, 佢小心地將頭髮撥到耳仔後面, 同時將個袋拋落地面。黃色液體慢慢滲漏到地面嘅落葉之上。

對壓爆眼球事件同V嘅埋怨完全冇放在心上, A只係緩緩地自言自語道:「人類應該就夠力用雙手劍吧?」

冇錯, A曾經幻想過好似啲戰士咁運用雙手劍同V一齊出去森林度搜獵, 但係因為佢天生擁有一對香雞咁嘅臂灣, 莫講話雙手劍, 就連一把普通短劍用起來都覺得好吃力。所以佢後來只係靠住老豆傳落嚟俾佢嗰把刀仔, 人哋用嚟切芝士食嗰種刀仔當係武器, 極之唔夠有型。

V有點唔耐煩, 但係同時又覺得A又真係幾可憐。態度有啲放軟地話:「喂呀, 你起碼都仲識得…」V停低落嚟, 嘗試搵一樣A善長嘅嘢出嚟安慰佢…但係過了半晌仍然未諗到。

「死喇, 條友仔讀咗咁耐, 學死靈系魔法, 到而家連骨仔都叫唔到一隻出嚟。每次打交佢最叻嘅就係放啲光球出嚟圍住隻嘢轉…」V心諗:「其實啲光球係用嚟做咩架呢呵?」

「仲識得放光波?」A自嘲地幫V講埋落去。V有點唔好意思地笑了一笑, 拍吓A膊頭道:「係吖! 你啲光波最近多咗好多隻唔同顏色, 好靚吖!」

A長長地嘆咗口氣, 覺得自己真係勁廢。人學魔法, 佢學魔法, 佢係要走去揀死靈系嚟學。呢個學系出咗名弱雞, 人哋個個放火放冰放刀仔出嚟攻擊, 佢就放光球, 搏敵人分心等佢可以乘機吉人兩刀。人哋嚮個地下度抓把泥土好有型咁拋向空中唸句咒語就變到隻大大隻嘅泥人出嚟做護法。佢? 首先佢要搵到啲死咗又化咗骨嘅人, 跟住要嚮佢哋副骨度刮啲骨碎出嚟, 再要將啲骨碎放入個盒仔度焗49個鐘, 之後拎出嚟磨成粉末備用。每次佢想召喚護法, 佢要先將啲骨灰撒嚮地上, 講咒語、做手印, 如果咁好彩附近有死靈經過, 咁就會附身於啲骨灰上變成骨仔戰士幫佢。噢, 當然仲要係晚上先有機會可以做到。完全唔明白點解呢個學系到今時今日都仲有人會去學…完全唔明白點解自己會走去學。

「哎呀, 你唔好咁氣餒啦…」V續道:「話唔定你之後就會學到啲好勁嘅魔法呢!」

A心知冇可能, 佢睇過曬嚟緊幾個學期啲課程。之後佢頂曬龍學到稍為有啲攻擊成份嘅係一個將敵人生命力吸走, 收入自己身體嘅魔法。聽啲教授講呢招吸返嚟嘅生命力係可以用嚟回復傷勢。A開頭勁開心, 終於有樣嘢可以對佢同V出外打獵時有用喇! 起碼佢可以幫V回復吖! 點知佢後來先知, 啲生命力係冇得過手, 吸完返嚟就要即刻用…即係只可以回復到佢自己。「頂! 咁叫咗隻骷髏戰士出嚟唔係佢頂住架咩? 回復我自己有X用呀? 」

為咗唔好因為自己嘅心情搞到V都唔開心, A裝著冇事咁回答:「嗯…」, 隨手就幫V拎起個袋, 都冇理會仲有啲液體流緊出嚟就孭上身, 繼續向前行。

V跟住A後面, 希望轉轉個氣氛, 將聲線稍為提高一點, 無目的地望向頭上嘅樹枝說道:「我哋應該拎夠甲蟲眼球, 可以返去交差啦?」A冇停下腳步, 亦冇回頭, 輕聲地回應咗一吓。目標仍然係向住城鎮嘅方向前進。

「其實阿守衛哥哥要咁多甲蟲眼球做乜?」V純粹好奇咁隨口問吓: 「條友仔係人經過同佢傾開佢都叫人幫佢搵啲眼球返嚟架喎…」

「你冇聽過咩?」A回應:「佢拎啲眼球去啲Troll村落嗰邊賣, 佢哋嗰邊啲人鍾意用嚟做湯, 轉個手可以賺好多呀。」

「吓?!」V聽罷覺得好驚奇, 不禁停下腳步, 腦裡面隨即問咗自己幾次同一個問題, 都搵唔到答案。A亦停低落嚟轉身望向V, 等佢繼續講落去:「咁點解我哋唔自己攞去賣賺多啲呀?」

「鬼唔知咩…」A其實都已經預料到V會咁問, 所以諗都唔駛諗已經馬上回應:「沿途有幾多怪物呀? 以我呢把牛油刀, 加埋你嗰個火球仔…」佢偷望一望V嘅眼神, 心裡暗自想自己句說話會唔會太過份, 隨即繼續補充道:「唔係講緊話甲蟲咁簡單喎, 沿路有食屍鬼、有超級大皇蜂、有彊屍青蛙…仲有!!」佢講到呢度自己都好似嚇親咁, 停咗一停先繼續:「仲有暗黑Bear Bear熊!」

暗黑Bear Bear熊乃係附近一帶最臭名遠播嘅生物。每年因為被Bear Bear熊突襲至死嘅個案多不勝數。佢喜歡躲嚮一啲黑暗嘅地方…冇錯, 暗黑森林都有分好黑暗同埋冇咁黑暗嘅地方…佢會好耐心咁等啲唔小心嘅旅客行過, 然後突然間撲出嚟襲擊。目擊者憶述事發嘅經過都話聽到一聲令人毛骨悚然、響亮刺耳嘅叫聲, 隨之而來只見血肉橫飛, 一個旅客不到兩秒就被解體成為肉醬。當啲屍塊都仲未跌到落地前, 暗黑Bear Bear熊就已經消失無蹤。

因為咁, 好多有經驗嘅獵人都會嚮暗黑森林度搜捕暗黑Bear Bear熊, 但係每一個人最後都係無功而還。

「暗黑Bear Bear熊…」V細心諗咗陣之後話:「都唔知係咪真嘅。咁耐以來都冇人見過佢嘅真正面貌…」

「咩呀!」A反駁道:「梗係有人見過! 佢哋都形容暗黑Bear Bear熊唔係普通好可愛肥嘟嘟咁嗰種熊, 而係一隻擁有一身漆黑毛皮、兩呎幾長鋒利指甲…」佢一面講, 一面扮出一個面目猙獰嘅表情, 雙手做成爪狀咁面對住V話:「佢對眼係放光嘅紅色, 手臂粗過你隻大脾, 平時係好似人咁行路…」

佢一路講一路望住V個表情, 見到佢聽到自己嘅形容, 開始都流露出懼色: 「聽講話佢仲擁有敏銳嘅聽覺, 就算係幾哩外有人跌咗支針落地佢都聽到…」

V開始愈來愈驚慌, 不斷冒汗, 面色都開始變青。A見狀, 知道自己講嘅嘢開始收效, 有點沾沾自喜咁想繼續講落去。但係呢個時候突然間身後傳來一把低沈嘅聲音問道:「你講緊我呀?」

未完…待續