艾殊網誌
964 views 0 comments

唔好買Shadow of War, 幫手宣傳呢件事出去

by on 九月 3, 2017
 

幫幫忙, 唔好買《Middle Earth: Shadow of War》。同你朋友講, 叫佢哋唔好買呢隻Game。解釋俾佢哋聽, 點解你俾錢買呢隻Game, 基本上係等於將你啲錢放入一間最賤格嘅公司個袋。等我簡單講你聽點解。講明, 呢篇文章我特別移除咗我可以移除到嘅廣告, 我係唔會用呢單嘢嚟賺錢…

首先最主要令我要寫呢篇嘢原因: 呢隻Game其中一個開發者, 最近因為腦癌病逝, 留下四個仔女同埋佢老婆。開發商Monolith決定將呢一個開發者做成為一個遊戲入面嘅人物, 當係DLC放入隻遊戲入面去紀念佢, 並想將賣呢個DLC嘅得益都捐贈俾呢個開發人嘅家庭。

So far so good? 問題嚟喇… Warner Bros搞好多宣傳出嚟, 又Trailer又剩, 但係佢將最重要一點收埋嚮一行細細嘅字入面: 隻DLC賣$5美金, 佢哋會留起$1.5美金做「手續費」。$1.5… 係人都知咩手續費都好, 唔駛要咁多錢 (Update: 讀者指出係平台抽成。對, 因為DLC都要經PSN, XBox Live同Steam發放, 佢哋會抽成。不過大家睇埋落去先), 不過算, 起碼有$3.5入到家屬嘅袋?

No。大家細心睇清楚佢嘅條款, 只有美國本土嘅人買呢個DLC嘅錢先會捐俾家屬, 仲要唔係全部52個洲, 當中有8個嘅錢係Warner Bros自己袋曬。明白到佢係可能因為啲法律問題先要咁做…但係咁你就唔好將呢樣嘢細細行字咁收埋, 擺明有心隱瞞。另外, 如果係法律上問題, 咁你都可以用第二啲方式去捐咗呢筆錢, 例如去啲研究癌症嘅慈善團體? 點都好過你自己袋曬佢呀?

講到呢度你應該明白點解我叫你唔好買呢隻Game… 呢間公司唔係咁玩呀? 發死人財不特止, 仲要將佢包裝成為一件善事? 你估單係美國嘅收入相比全世界其他地方, 邊個會有多啲錢買呢隻DLC? 仲要加埋嗰$1.5手續費? 佢呢單一定係賺多過捐, 我敢拍心口講。

呢個係第一個主要原因。你可能會覺得, 咁唔買隻DLC咪得囉… …… 如果你真係咁想, 第一、我真係想打鑊你, 因為呢間公司咁發自己員工嘅死人財你都仲要幫襯佢。第二、呢隻Game已經有三個唔同嘅版本, 價錢由$468到$768。普通、銀版同金版, 佢仲要再加埋課金系統賣Loot Box。

你唔覺得咁好過份? 一隻遊戲要拆開咁嚟賣到$800… 你話隻Game要用好多錢開發呀, 所以要咁囉? 大話。你真係信? 如果係咁, 當初佢哋點解要做呢隻Game做到咁大Budget? 邊有人做一定蝕本生意? 每年股東大會佢哋講到自己幾咁好賺, 對住啲Gamer就話自己冇錢搵, 所以要拆開隻遊戲賣? 要搞課金玩合法賭博?

佢仲要做到隻遊戲入面有個Online模式, 係要你靠用買呢啲Loot Box入面得到嘅嘢去「贏」其他人。即係話, 你想玩得好, 你就一定要同佢買Loot Box。

你就算唔想理佢, 自己玩單人遊戲都好, Sorry, 唔得。因為佢個Online模式入面, 你Offline儲嘅嘢, 係會俾人Online攻你, 打死你啲人物。情況就好似當年Konami隻Metal Gear一樣。你Offline玩嘅嘢會俾人Online搶走, 迫你要用錢買呢啲Loot Box, 或者, 任人攞你嘅嘢, 又或者… 不如唔好玩啦?

最後, 如果你認同我講嘅嘢, 請你宣傳出去, 俾大家知呢隻遊戲同埋呢間公司所做嘅嘢。唔好俾一分一毫呢隻遊戲, 又或者呢間公司。如果你真係好想玩呢隻Game, 我明, 因為我都真係好想玩…但係, 等… 等減價, 等佢個GOTY, 等佢知自己做錯, 返轉頭改曬呢啲嘢先。千祈唔可以俾個訊息佢, 佢做呢啲嘢係冇問題。

多謝大家。

最後貼上Total Biscuit一個Video詳細解釋呢件事:

Jim Sterling節目Jimquisition: