艾殊網誌
251 views 0 comments

《American Anarchist》- 一個熱血過後40年嘅故事

by on 八月 7, 2017
 

 

呢個世界上, 唔妥政府施政、唔喜歡個社會制度嘅人唔少, 但係真係會不滿到走去執筆寫本書出嚟教人自製炸彈同武器嘅真係冇咩幾多個。William Powell係其中一個。佢嚮1971年寫咗一本叫做《The Anarchist Cookbook》(無政府主義者的食譜), 呢本書入面, 不單止有好多自製武器同炸彈嘅方法, 仲有William Powell於19歲時寫下嘅反政府宣言。

當時正係反越戰同反主流文化運動嘅高峰期。作者Powell就係其中一個被當時嘅社會文化感染嘅其中一人。佢認為呢啲製作武器同炸彈嘅知識唔可以只可以由軍隊同埋政府擁有, 人民都應該要有同樣嘅力量去同呢班當權者抗衡。

本書推出之後, 當然引起好多公眾討論。而William Powell就一直活在寫咗呢本書嘅後遺症入面40幾年。佢本書, 就好似遊戲GTA咁…差不多每單校園鎗擊案、又或者有人放炸彈, 最後都一定發現個疑犯藏有佢本書 (同埋玩過GTA)。

40年後, 佢本書已經賣出2百萬本, 但係Powell已經唔再係當時嘅忿世年青人, 佢已經變成為一個熱心公益、為世界各地有學習障礙嘅小朋友努力嘅人。導演多次嘗試去問佢一啲好尖銳嘅問題、世人都當佢係一個惡魔。但係同時間發行緊呢本書嘅商人則繼續可以用佢本書賺錢…冇人對佢哋問責。

American Anarchist》呢套紀錄片就係睇返今時今日, 到底Powell活在一個咩情況下, 同埋佢有冇為自己寫嘅書而感到後悔。紀錄片推出後不久, Powell已經因為心臟病發離世。呢套嘢可謂係佢最後一個機會為自己平反。

我唔知大家會點諗, 但係我睇完之後, 我真係有點同情佢… 尤其係知道原來佢係賣斷咗個版權冇錢收嘅。點解啲人唔會問下個出版商有冇可能唔出呢本書, 又或者佢哋背負緊咩責任? 點解淨係攻擊一個19歲時寫咗本書嘅人? 呢套嘢, 值得一睇。